ಧರ್ಮಸ್ಥಳ, ಆ. 4: ಶ್ರೀ ಕ್ಷೇತ್ರ ಧರ್ಮಸ್ಥಳದ ಅಧಿದೈವ ಶ್ರೀ ಮಂಜುನಾಥ ಸ್ವಾಮಿಯ ಮೇಲಿನ ಅಚಲ ಭಕ್ತಿ ಮತ್ತು ಕೃತಜ್ಞತೆಯ ಸಂಕೇತವಾಗಿ ಉಡುಪಿ ಕರಾವಳಿಯ ಆಳಸಮುದ್ರ ಟ್ರಾಲ್ ಬೋಟ್ ಮೀನುಗಾರರು 770 ಗ್ರಾಂ ತೂಕದ ಬೆಳ್ಳಿಯ ‘ರಾಣಿ ಮೀನು’ ಹಾರವನ್ನು ಸಮರ್ಪಿಸಿದ್ದಾರೆ. ಇದರ ಮೌಲ್ಯ ಸುಮಾರು ₹2.45 ಲಕ್ಷವಾಗಿದ್ದು, ಉಳಿದ ₹2,84,125 ಮೊತ್ತವನ್ನು ಶ್ರೀ ಕ್ಷೇತ್ರ ಧರ್ಮಸ್ಥಳದ ಅನ್ನದಾನ ಸೇವೆಗೆ ದೇಣಿಗೆಯಾಗಿ ನೀಡಿದ್ದಾರೆ.

2025ರಲ್ಲಿ ಉಡುಪಿ ಕರಾವಳಿಯಲ್ಲಿ ತೀವ್ರ ಮತ್ಸ್ಯ ಕ್ಷಾಮ ಉಂಟಾಗಿ ಮಲ್ಪೆ ಬಂದರನ್ನು ಅವಲಂಬಿಸಿರುವ ಅನೇಕ ಮೀನುಗಾರರು ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದ್ದರು. ಈ ಸಂದರ್ಭದಲ್ಲಿ ಅವರು ಶ್ರೀ ಕ್ಷೇತ್ರ ಧರ್ಮಸ್ಥಳಕ್ಕೆ ತೆರಳಿ, ಸಮುದ್ರದಲ್ಲಿ ಮತ್ಸ್ಯ ಸಂಪತ್ತು ಹೆಚ್ಚಾಗಲಿ ಹಾಗೂ ಉತ್ತಮ ಮೀನುಗಾರಿಕೆ ದೊರೆಯಲಿ ಎಂದು ಶ್ರೀ ಮಂಜುನಾಥ ಸ್ವಾಮಿಗೆ ಹರಕೆ ಹೊತ್ತಿದ್ದರು.

ಅದೇ ವೇಳೆ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ. ಡಿ. ವೀರೇಂದ್ರ ಹೆಗ್ಗಡೆ ಅವರನ್ನು ಭೇಟಿ ಮಾಡಿದ ಮೀನುಗಾರರಿಗೆ, “ಈ ಬಾರಿ ಉತ್ತಮ ಮೀನುಗಾರಿಕೆ ದೊರೆತರೆ ನಿಮ್ಮ ಕೈಲಾದಷ್ಟು ಬೆಳ್ಳಿಯ ಕಾಣಿಕೆಯನ್ನು ಸ್ವಾಮಿಗೆ ಅರ್ಪಿಸಿ” ಎಂದು ಸಲಹೆ ನೀಡಲಾಗಿತ್ತು.

2026ರ ಮೀನುಗಾರಿಕೆ ಋತುವಿನಲ್ಲಿ ಉಡುಪಿ ಕರಾವಳಿಯಲ್ಲಿ ಉತ್ತಮ ಪ್ರಮಾಣದ ಮೀನು ದೊರೆತ ಪರಿಣಾಮ ಅನೇಕ ಮೀನುಗಾರರ ಆರ್ಥಿಕ ಸ್ಥಿತಿ ಸುಧಾರಿಸಿತು. ಇದನ್ನು ಶ್ರೀ ಮಂಜುನಾಥ ಸ್ವಾಮಿಯ ಕೃಪೆಯೆಂದು ನಂಬಿದ ಸುಮಾರು 200 ಮೀನುಗಾರರು ಹಾಗೂ ಬೋಟ್ ಮಾಲೀಕರು ಸ್ವಯಂಪ್ರೇರಿತವಾಗಿ ಹಣ ಸಂಗ್ರಹಿಸಿ ಒಟ್ಟು ₹5,29,125 ಮೊತ್ತವನ್ನು ಕೂಡಿಸಿದರು.

ಈ ಮೊತ್ತದಲ್ಲಿ ₹2.45 ಲಕ್ಷ ವೆಚ್ಚದಲ್ಲಿ 770 ಗ್ರಾಂ ತೂಕದ ಬೆಳ್ಳಿಯ ‘ರಾಣಿ ಮೀನು’ ಹಾರವನ್ನು ತಯಾರಿಸಿ ಶ್ರೀ ಮಂಜುನಾಥ ಸ್ವಾಮಿಗೆ ಸಮರ್ಪಿಸಲಾಯಿತು. ಉಳಿದ ₹2,84,125 ಮೊತ್ತವನ್ನು ಕ್ಷೇತ್ರದ ಅನ್ನದಾನ ಸೇವೆಗೆ ದೇಣಿಗೆಯಾಗಿ ಅರ್ಪಿಸಲಾಯಿತು.

ಮಲ್ಪೆ ಆಳಸಮುದ್ರ ಟ್ರಾಲ್ ಬೋಟ್ ಸಂಘದ ಪ್ರತಿನಿಧಿ ಸುಭಾಷ್ ಮೆಂಡನ್ ಮಾತನಾಡಿ, “ಇದು ಕೇವಲ ಹರಕೆ ತೀರಿಸುವ ಕಾರ್ಯವಲ್ಲ; ನೂರಾರು ಮೀನುಗಾರರ ಬದುಕಿನಲ್ಲಿ ಆಶಾಭರವಸೆ ಮೂಡಿಸಿದ ಶ್ರೀ ಮಂಜುನಾಥ ಸ್ವಾಮಿಯ ಕೃಪೆಗೆ ಸಲ್ಲಿಸಿದ ಕೃತಜ್ಞತೆಯ ಸಂಕೇತವಾಗಿದೆ. ಬಡವರು-ಶ್ರೀಮಂತರು ಎನ್ನದೆ ಎಲ್ಲರೂ ತಮ್ಮ ಕೈಲಾದಷ್ಟು ಕಾಣಿಕೆ ನೀಡಿರುವುದು ಮೀನುಗಾರರ ಒಗ್ಗಟ್ಟು ಮತ್ತು ಭಕ್ತಿಗೆ ಸಾಕ್ಷಿಯಾಗಿದೆ,” ಎಂದು ಹೇಳಿದರು.

ಕರಾವಳಿ ಭಾಗದಲ್ಲಿ ವಿಶೇಷ ಮಹತ್ವ ಹೊಂದಿರುವ ‘ರಾಣಿ ಮೀನು’ ಮಾದರಿಯ ಬೆಳ್ಳಿಯ ಹಾರವನ್ನು ಸಮರ್ಪಿಸಿರುವುದು ಸಮುದ್ರದ ಮೇಲಿನ ನಂಬಿಕೆ, ಮೀನುಗಾರಿಕೆಯ ಮೇಲಿನ ಗೌರವ ಹಾಗೂ ದೇವರ ಕೃಪೆಗೆ ಸಲ್ಲಿಸಿದ ಕೃತಜ್ಞತೆಯ ಪ್ರತೀಕವಾಗಿದೆ.