ಸೋಮಂತಡ್ಕ: ರಾಷ್ಟ್ರೀಯ ಹೆದ್ದಾರಿ ಬದಿಯಲ್ಲಿ ಅಳವಡಿಸಲಾಗಿರುವ ದಾರಿದೀಪಗಳು ಕೆಲ ದಿನಗಳಿಂದ ಸಂಜೆಯಾಗುತ್ತಿದ್ದಂತೆ ನಗರಕ್ಕೆ ಅಲಂಕಾರ ಮಾಡಿದಂತೆ ಬೆಳಕು ಚೆಲ್ಲುತ್ತಿದ್ದವು. ಆದರೆ ಇದೀಗ ಸೋಮಂತಡ್ಕ ಪೇಟೆಯ ಒಂದು ಬದಿಯ ದಾರಿದೀಪಗಳು ಬೆಳಗದೆ ಕತ್ತಲು ಆವರಿಸಿದ್ದು, ಸಾರ್ವಜನಿಕರ ಓಡಾಟಕ್ಕೆ ತೊಂದರೆಯಾಗುತ್ತಿದೆ.

ಮೊಬೈಲ್‌ಗಷ್ಟೇ ಅಲ್ಲ, ಹೆದ್ದಾರಿ ದಾರಿದೀಪಕ್ಕೂ ರೀಚಾರ್ಜ್!

ಈ ದಾರಿದೀಪಗಳಿಗೆ ಪ್ರೀ-ಪೇಯ್ಡ್ ಸ್ಮಾರ್ಟ್ ಮೀಟರ್ ಅಳವಡಿಸಲಾಗಿದ್ದು, ಮೊಬೈಲ್ ರೀಚಾರ್ಜ್ ಮಾಡುವ ರೀತಿಯಲ್ಲೇ ಮುಂಗಡ ಹಣ ಪಾವತಿಸಿ ವಿದ್ಯುತ್ ಬಳಕೆ ಮಾಡಬೇಕಾಗಿದೆ. ಕಳೆದ ಕೆಲ ದಿನಗಳಿಂದ ರೀಚಾರ್ಜ್ ಅವಧಿ ಮುಗಿದಿರುವ ಕಾರಣ ದಾರಿದೀಪಗಳ ಸಾಲು ಬೆಳಗುತ್ತಿಲ್ಲ ಎನ್ನಲಾಗಿದೆ.

ಈ ಸಮಸ್ಯೆಗೆ ಪರಿಹಾರವಾಗಿ ಪೋಸ್ಟ್-ಪೇಯ್ಡ್ ಸ್ಮಾರ್ಟ್ ಮೀಟರ್ ಅಳವಡಿಸುವಂತೆ ಸಂಬಂಧಪಟ್ಟ ಇಲಾಖೆಯವರು ಮೆಸ್ಕಾಂಗೆ ಮನವಿ ಸಲ್ಲಿಸಿದ್ದಾರೆ ಎಂದು ತಿಳಿದುಬಂದಿದೆ.

ದಾರಿದೀಪಗಳ ನಿರ್ವಹಣೆಯ ಹೊಣೆ ಹೊತ್ತವರಿಗೆ ಆಗಾಗ ರೀಚಾರ್ಜ್ ಮಾಡುವ ತಲೆನೋವು ಒಂದೆಡೆಯಾದರೆ, ಮತ್ತೊಂದೆಡೆ ಸಂಜೆಯ ವೇಳೆಯಲ್ಲಿ ಕತ್ತಲಲ್ಲಿ ಸಂಚರಿಸಬೇಕಾದ ಪರಿಸ್ಥಿತಿ ದಾರಿಹೋಕರಿಗೆ ಮತ್ತು ವಾಹನ ಸವಾರರಿಗೆ ತೊಂದರೆ ಉಂಟುಮಾಡುತ್ತಿದೆ.

ಸಮಸ್ಯೆ ಶೀಘ್ರವೇ ಬಗೆಹರಿಸಿ ದಾರಿದೀಪಗಳನ್ನು ಮತ್ತೆ ಬೆಳಗಿಸುವಂತೆ ಸಾರ್ವಜನಿಕರು ಸಂಬಂಧಪಟ್ಟ ಅಧಿಕಾರಿಗಳನ್ನು ಒತ್ತಾಯಿಸಿದ್ದಾರೆ.